HIJRAH

Titik wanci menungso ono ing palenggahaning urip,
Urip kang sak becik’e urip,
Urip gemawang nang paran….parane “ AKARYO JAGAT “,
Jagat sak isine kudu ngerti pawohing pakarti,
Pakarti budi luhur soko kersa ning Allah ta’allah sing duweni singgahsana abadi.

Mulo ugo menungso sing kasembadan…Ojo tho podho rumongso,
Rumongso kang kaninggaling kawulo,
Kawulo kuwi kudu ngerti sabdyoning alam,
Alam kang katatan , sak tenanne,
Sak tenanne menungso kuwi mung kawijangan rumongso,
Kabeh kuwi kudu ngerti sak tenanne marang Gusti kang akaryo jagat,
Kang duweni gede rumongso kuwi kawijangane Gusti Allah.

اَلسَّلاَمُ عَلَيْكُمْ وَرَحْمَةُ اللهِ وَبَرَكَاتُهْ

اَلْحَمْدُ ِللهِ اَلْحَمْدُ ِللهِ  الَّذِي أَرْسَلَ رَسُوْلَهُ وَأَمَرَهُ مَعَ أَصْحَابِهِ بِالْهِجْرَةِ$ مِنْ مَكَّةَ الْمُكَرَّمَةِ اِلَى الْمَدِيْنَةِ الْمُنَوَّرَةِ$ أَشْهَدُ أَنَّ لآ إِلَهَ إِلاَّ اللهُ وَحْدَهُ لاَ شَرِيْكَ لَهُ، وَأَشْهَدُ أَنَّ مُحَمَّدًا عَبْـدُهُ وَرَسُوْلُهُ الْمَبْعُوْثُ بِالرِّسَالَةِ الْمُنِيْرَةِ$ اَللَّهُمَّ صَلِّ وَسَلِّمْ عَلَى سَيَّدِنَا مُحَمَّدٍنِ الْمُؤَيَّدِ بِالْمُعْجِزَاتِ الْبَاهِرَةِ وَعَلَى آلِهِ وَأَصْحَابِهِ ذَوِى الْمَنَـاقِبِ الْفَاخِرَةِ$ أَمَّـا بَعْـدُ فَيَـا أَيُّهَا اْلإِخْـوَانِ رَحِمَكُمُ اللهِ، أُوْصِيْكُمْ وَإِيَايَ بِتَقْوَى اللهِ لَعَلَّكُمْ تُفْلِحُوْنَ$ فَقَدْ قَالَـ تَعَالَى فِي كِتَابِهِ الْكَرِيْمِ: إِنَّ الَّذِينَ آمَنُوا وَالَّذِينَ هَاجَرُوا

وَجَاهَدُوا فِي سَبِيلِ اللهِ أُولَئِكَ يَرْجُونَ رَحْمَةَ اللهِ وَاللهُ غَفُورٌ رَحِيمٌ

Mangga kita samiya nambahi taqwa lan ta’at kita dateng Allah, kanti mbudi daya amrih saget tansah nindakaken sedaya perintah lan dawuh dawuhipun Allah, saha nilar lan nebihi sedaya awisanipun, wonten ing pundi kemawon kawontenan kita, lan wonten ing swasana kados menapa kemawon, nuju bingah utawi sisah, kawontenan jembar longgar utawi rupeg, ing kawontenan rame utawi sepi, tansah netepana taqwa dateng Allah supados kita tansah pikantuk rahmat saking ngarsa dalem Allah Ta’ala.

Kita sedaya sami ngawuningani bilih wulan Muharram punika minangka kawitanipun tahun hijriyah, inggih tahun Islam, Wulan Muharram mila mengku sejarah ingkang sanget wigatos tumrap perkembangan dakwah Islam. Jalaran awal kemenangan Islam lan kejayaan Islam punika kapurwakan kanti prastawa jengkar dalem Rasulullah Sallallahu ‘alaihi wa sallam, saking kita Makkah tumuju dateng Madinah ingkang kala semanten tasih dipun wastani kita Yatsrib.

Hijrahipun Rasulullah SAW. lan para shahabatipun nilar negari Makkah mboten jalaran ajrih ngadepi mengsah tiyang-tiyang kafir Quraisy saha ancamanipun, ugi mboten jalaran kalah perang, melarikan diri tinggal glanggang colong playu punika mboten,  nanging jalaran nindakaken dawuhipun Allah Ta’ala. Prastawa hijrah punika mila mbetahaken bebanten lan pangorbanan ingkang ageng tumrap Nabi lan para shahabatipun, mboten sekadar nilar setunggaling papan tumuju dateng panggenan sanes. Bidalipun para sahabat punika kanti kebak ancaman, intimidasi lan terror. Ananging tekat ingkang sampun bulat, manah manteb lan ikhlash, para sahabat nilaraken sanak keluarga ingkang sanget dipun tresnani, arta banda ingkang katah, bale griya lan sedaya hak milik ipun, sedayanipun dipun tilaraken lan kalilakaken jalaran mundi dawuhipun Allah lan Rasulipun. Tekad ingkang mekaten kerana ugi dipun semangati lan  dipun sugesti dening dawuh Dalem Allah Ta’ala:

وَمَنْ يُهَاجِرْ فِي سَبِيلِ اللهِ يَجِدْ فِي اْلأَرْضِ مُرَاغَمًا كَثِيرًا وَسَعَةً وَمَنْ يَخْرُجْ مِنْ بَيْتِهِ مُهَاجِرًا إِلَى اللهِ وَرَسُولِهِ ثُمَّ يُدْرِكْهُ الْمَوْتُ فَقَدْ وَقَعَ أَجْرُهُ عَلَى اللهِ وَكَانَ اللهُ غَفُورًا رَحِيمًا

“Sapa wonge hijrah ing dalane Allah, mangka deweke mesti bakal nemu bumi iki minangka panggonan kang jembar, lan rizki kang akeh, lan sapa wonge metu sangka omahe kerana hijrah tumuju marang karidlane Allah lan utusane tumuli pati sumusul ing deweke, mangka temen-temen ganjarane ing ngarsane Allah. Lan Allah iku Dzat Kang akeh pangapurane lan Dzat Kang akeh kawelasane” (QS.An Nisa : 100).

Lan wusananipun terang lan nyata bilih hijrahipun Rasulullah SAW. punika mengku hikmah lan piwucal ingkang sanget wigatos. Inggih punika mujudaken setunggaling strategi perjuangan lan siasat kangge nggayuh cita-cita perjuangan Islam.

tetela dados kasunyatan bilih Umat Islam ngraosaken hikmah saking prastawa hijrah punika, kasunyatan pangorbananipun mboten sia-sia, umat Islam saya ngrumbaka, ketingal sanget kemajengan lan perkembangan Islam. Sahingga Umat Islam kepengin sanget ngrebat kita Makkah minangka tanah kelahiran tumrap kaum Muhajirin, saha papan suci tumrap sedaya kaum muslimin.  Sak estu pepinginanipun Umat Islam dados kasunyatan,  kanti pitulunganipun Allah, kita Makkah ingkang dipun kuaosi tiyang kafir Quraisy, saget karebat dening kanjeng Nabi lan sedaya shahabatipun ingkang wicalanipun mboten kirang saking sedasa ewu tiyang. Tentu tiyang kafir Quraisy miris ngadepi Kanjeng Nabi ingkang kaderek aken wadyia bala umat Islam segelar sepapan. Kanti tanpa pangorbanan lan pertumpahan darah kita Makkah sampun kasil kabedhah. Abu Sufyan benggolipun tiyang Quraisy teluk lan tundhuk, menyerah dateng ngarsa dalem kanjeng Nabi lan ngikraraken mlebet Islam. Mekaten ugi tiyang-tiyang sanes berbodong-bondong same nelakaken syahadat lumebet Islam.

Prastawa bedhahipun Nagari Makkah punika kados ingkang kagambaraken wonten ing dawuhipun Allah:

إِذَا جَاءَ نَصْرُ اللهِ وَالْفَتْحُ$ وَرَأَيْتَ النَّاسَ يَدْخُلُونَ فِي دِينِ اللهِ أَفْوَاجًا$ فَسَبِّحْ بِحَمْدِ رَبِّكَ وَاسْتَغْفِرْهُ إِنَّهُ كَانَ تَوَّابًا

“Nalika wus tumurun pitulunge Allah, lan kamenangan, lan sira nyawang  para manungsa pada mlebu marang agamane Gusti Allah kelawan grombol-grombol. Mula macaha tasbih sira kelawan pujine Pangeranira, lan sejatine Allah iku Dzat Kang akeh anggone nerima taubat”. (QS.An Nashr 1-3).

Prastawa hijrahipun Rasulullah punika kedah kita damel piwucal lan patuladan, semanget hijrah kedah tansah tumanem ing saben saben manahipun tiyang Islam. Dene hijrah punika wonten werni kalih:

Sepisan          :  hijrah qalbiyah, hijrah secara mental.

Kaping kalih  :   hijrah badaniyah, hijrah secara fisik.

Wondene hijrah ingkang kedah kita tindak aken punika hijrah ingkang sepisan, inggih hijrah secara mental tegesipun nilar pendamel lan lelampah  awon tumuju dateng kesahenan. Kados ingkang kadawuhaken ing Al-Qur’an :

وَالرُّجْـزَ فَاهْجُـْر

“Lan ing perkara kang ala, mangka sira ninggalna” (QS. Al-Muddatstsir : 5).

Dawuh ipun Allah kasebat ugi kadawuhaken dening Rasulullah Sallallahu ‘alaihi wasallam :

اَلْمُسْلِمُ مَنْ سَلِمَ الْمُسْلِمُوْنَ مِنْ لِسَانِهِ وَيَدِهِ، وَاْلمُهَاجِرُ مَنْ هَاجَرَ مَانَهَى اللهُ عَنْهُ

“Kang aran wong Islam sejati yaiku wong kang lisane lan tangane orang ngganggu wong liya  (tegese,  wong liya aman sangka gangguan penggaweane lan lisane),  dene wong kang hijrah yaiku wongkang ninggalake perkara kang dilarang dening Allah”. (HR. Bukhari, Muslim).

Hijrah secara mental mekaten tentu wajib tumrap sedaya umat Islam sepanjang zaman, kangge hijrah tumuju kesaenan saha nggayuh kemenangan.

Wusananipun mangga kita samiya mawas ing pribadi kita, punapa kita sampun nderek tindak Rasul hijrah menapa dereng? Mugi swasana warsa enggal hijriyah punika sageta nyemangeti dateng kita nindakaken hijrah secara mental, kultural, sosial lan material tumuju dateng kawontenan ingkang langkung sae, nggayuh kemenangan lan kejayaan Islam ing masa depan. Mugi-mugi Allah tansah mitulungi lan ngijabahi.

بَارَكَ اللهُ لِي وَلَكُمْ فِي الْقُرْآنِ الْكَرِيْمِ$ وَنَفَعَنِي وَإِيَّا كُمْ بِااْلآيَاتِ وَالذِّكْرِ الْحَكِيْمِ$ إِنَّهُ هُوَ التَّوَّابُ الرَّحِيْمِ  قَالَ تَعَالَى وَهُوَ أَصْدَقُ اْلقائِلِيْنَ: أَعُوْذُبِاللهِ مِنَ الشًّيْطَانِ الرَّجِيْمِ$ بِسْمِ اللهِ الرَّحْمَنِ الرَّحِيْمِ  وَالْعَصْرِ إِنَّ اْلإِنْسَانَ لَفِي خُسْرٍ$ إِلاَّ الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ$ وَقُلْ رَبِّ اْغفِرْ وَارْحَمْ وَأَنْتَ خَيْرُ الرَّحِمِيْنَ